थारु पहाडी भाईभाई, चार गाविस हाईहाई, नगरपालिका चाहिंदैन, चार गाविस फोड्न पाइँदैन’ भन्ने नारा लगाउँदै र्याली गुलरियाका विभिन्न स्थानहरु परिक्रमा गरी जिल्ला विकास समितिको मुलगेटमा पुगेर धर्ना र कोणसभामा परिणत भएको थियो ।

कार्यक्रममा चारवटा गाविसको छुट्टै स्थानीय निकाय बनाउन माग गर्दै स्थानीय निकाय पुनःसंरचना प्राविधिक सहयोग समिति समक्ष ज्ञापन पत्र पेश गरेका छन् । कार्यक्रममा संयुक्त संघर्ष समितिका संयोजक मोहनलाल थारुले प्राविधिक सहयोग समितिका संयोजक तथा स्थानीय विकास अधिकारी तेजराज शर्मालाई ज्ञापन पत्र बुझाएका थिए ।

ज्ञापनपत्र बुझ्दै संयोजक शर्माले एकचोटी सम्पूर्ण राजनीतिक दलहरुबीच जिल्लाको पुनःसंरचनासम्बन्धी संख्या र सिमाका बारेमा छलफल गरिने बताउनु भयो । यसैगरी गएको २ गते सानोश्रीतारातालका बासिन्दाहरुले पनि स्थानीय पुनःसंरचना सहयोग समिति तथा स्थानीय राजनीतिक दलहरुले सानोश्रीताराताल नगरपालिकालाई गुलरियामा मर्ज गर्न खोजेको भन्दै त्यसको विरोधमा ज्ञापनपत्र पेश गरेका थिए ।

स्थानीय निकाय पुनःसंरचना आयोगले बर्दियाका लागि पाँचवटा स्थानीय निकाय बनाएर सिफारिस गर्न भनेपनि अधिकांश दलहरुले यो संख्या अप्रयाप्त भएको भन्दै संख्या बढाउन माग गरेका छन् । जिल्लामा एमालेले पाँच वटा निकाय बनाउन प्रस्ताव गरेको छ भने माओवादीकेन्द्र लगायत अन्य १६ वटा दलहरुले ८ वटा निकाय बनाउनका लागि सहयोग समितिमा प्रस्ताव गरेका छन् ।