रेडियो नेपाल अब २४ घण्टा सञ्चालन हुने, गुणस्तर खस्किएको भन्दै सुधार्न सञ्चारमन्त्रीको निर्देशन
चैत
रेडियो प्रसार सेवा विकास समिति (रेडियो नेपाल) ले आगामी भदौ १ देखि चौबिसै घन्टा प्रसारण गर्ने भएको छ ।
हाल मिडियम वेभ, अनलाइन र २१ वटा एफएम रिले केन्द्रमार्फत केन्द्रीय र क्षेत्रीय कार्यक्रम सञ्चालन गर्दै आएको मुकुककै सबैभन्दा जेठो र पुरानो सो संस्थाले ‘व्यवस्थापन सुधार कार्यान्वयन कार्ययोजना’ बमोजिम २४सै घन्टा प्रसारण गर्ने भएको हो ।
प्राविधिक उपकरणलाई समयानुकूल बनाउने र उच्चस्तरको सर्टवेभ स्थापना गरी प्रसारण सेवालाई आधुनिकीकरण गर्न लागेको रेडियो नेपालले समितिका संस्थापक तारणीदत्त कोइरालाको सम्झनामा विराटनगरमा स्मृति सञ्चार ग्राम स्थापना गर्न लागेको आज यहाँ आयोजित कार्यक्रममा जानकारी दिइयो ।
सो अवसरमा सूचना तथा सञ्चार मन्त्री शेरधन राईले नयाँ संविधानबमोजिम आफ्नो कार्यशैली बदल्न सुझाव दिएकैले आज रेडियो नेपाल यो अवस्थासम्म आइपुग्न सफल भएको हो भन्नुभयो ।
अब कुनै पनि सरकारी सञ्चारमाध्यमले यथास्थितिमा नरही परिवर्तन गर्नुपर्नेमा जोड दिँदै उहाँले जेठो र पुरानो संस्था रेडियो नेपालबाटै सुधारका कार्य अघि बढाएको जानकारी दिनुभयो ।
गणतन्त्रलाई संस्थागत गर्न स्थानीय तहसम्म रेडियोका कार्यक्रम अघि बढाउनुपर्नेमा सुझाव दिँदै मन्त्री राईले प्रतिबद्धताबमोजिम विलम्ब नगरी परिणाममुखी नतिजा निकाल्न आजैबाट प्रत्येक महिना कामको प्रतिवेदन बुझाउनुपर्नेमा जोड दिनुभयो ।
रेडियो नेपाल सञ्चालक समितिका अध्यक्षसमेत रहनुभएका सूचना तथा सञ्चार मन्त्रालयका सचिव दिनेशकुमार थपलियाले राष्ट्रकै सञ्चारमाध्यमका रुपमा उभ्याउन घोषणा गरिएका सुधारका कार्यक्रम पूरा गर्न कुनै कसर नराख्ने प्रतिबद्धता व्यक्त गर्नुभयो ।
सबै क्षमतालाई एकीकृत गरेर निश्चित समयभित्र सुधार गरेर देखाउन र व्यावसायिक प्रतिस्पर्धा तथा गुणस्तरीय सेवा दिन नयाँ प्रविधिका साथै नयाँ कार्यक्रमको उत्पादन तथा प्रसारणमा जोड दिनुपर्ने, वित्तीय स्रोत जुटाउनुपर्ने उल्लेख गर्दै उहाँले यसका लागि अन्य संस्थासँग सहयोग र साझेदारीका लागि प्रयत्न गर्ने पनि सुझाव दिनुभयो ।
रेडियो नेपालका कार्यकारी निर्देशक सुरेशकुमार कार्कीले सो संस्थाको वर्तमान स्थिति, भावी रणनीति, भौतिक तथा आर्थिक अवस्था, चुनौतीलगायतका व्यवस्थापन सुधारका कार्ययोजना प्रस्तुत गर्नुभएको थियो । रासस
0 comments
Write Down Your Responses